- कलाकारलाई राज्यले हेर्ने नीति नहुँदा माग्नेको जस्तै अवस्था -
- नरेन्द्र बस्नेत
मोरंग, असोज २२– उमेरले झण्डै ६ दशक पार गर्ने तयारी गरिरहेका बेला शुरेस गन्धर्र्बले सारङगी रेटेर गाँउ बस्तीहरुमा जनताको गीत सुनाएको पनि झण्डै पाँच दशक पुगिसकेको छ । तर बिडम्बना यतिका बर्ष सारङगी रेट्दा पनि उनलाई जिबन चलाउन धौ–धौ परि नै रहेको छ ।
यतिबेला गन्धर्बको साथमा एउटा झोलामा सारङगी र मिठो स्वर बाहेक केही छैन । जिबन गुजारा गर्ने गतिलो आधार,न त बैङक ब्यालेन्स नै छ न त घरघडेरी नै छ उनीसँग केबल आत्मविश्वास । विस २०१२ साल असार २५ गते भोजपुर जिल्लाको जरायोटार माङदीनमा जन्मिएका गन्धर्ब गाँउ बेसीमा सारङगी चाँही सानै उमेरदेखी रेट्न थालेको बताउँछन । सोही क्रममा २०२७ सालमा सुनसरीको धरानमा बसोबास गरिरहेका गन्धर्बले २०३१ सालमा विवाह गरे अनि ८ जना सन्तानका पिता पनि बने । उनका एक छोरा सारङगीकै बिषयमा अध्यायनरत छन्, एक बुहारी एकमात्र नेपालकी सारङगी बजाउने महिलाका रुपमा परिचित छिन, उनी हाल विदेशमा रहेकी छिन । भने अन्यले यतिखेर अरु नै जिवन जिउने बिकल्प रोजिसकेका छन् ।वि.स. २०४९ सालमा रेडियो नेपालमा रिङके बुङको राँगालाई नामक गीत रेकर्ड गराएर सर्वाधिक श्रोताहरुको मन जित्न सफल भएका गन्धर्बले अहिले सम्म ६ वटा गीतहरु रेकर्ड गराई सकेका छन्, भने गरीबको दुःख गएन नामक गीत जुन आफनै कथा व्याथा समेटिएको छ । रेकर्ड भईरहेको छ । गन्धर्बको एउटै गुनासो छ राज्य र सम्बन्धित पक्षसँग कलाकारलाई बाँच्ने अवस्था नबनाई दिएकोमा । आर्थिक अवस्थाकै कारण आज आफ्नो यो हबिगत भएको उनको गुनासो छ ।
नेकपा एमालेका मनोमोहन अधिकारीदेखी गिरिजाप्रसाद कोइराला हुँदै नेपालका सबैजसो राजनीतिक दलका कार्यक्रममा सारङ्गी रेटेर उनीहरुलाई भोट माग्न सघाईसकेका गन्धर्बलाई भोट नजितिञ्जेलसम्म दिएको आश्वासन र जितेपछि फर्केर नहेरेको प्रति उनको ठुलो गुनासो रहेछ ।
कुनैबेला खर्साङ र दार्जिलिङमा रेडियोमा समेत काम गरेका गन्धर्ब केही बर्ष रोगले थलिएपछि शुभचिन्तकहरुले साथ दिएर उपचार गरिदिएपछि यतिखेर पुन सक्रिय भएका छन् । पूर्वका विभिन्न जिल्लादेखी भारतका विभिन्न ठाँउका कार्यक्रममा सहभागी भएर उनले त्यहीबाट आएको सामान्य रकमले गुजारा चलाईरहेका छन । गन्धर्बहरुको संस्कृति र सारङगी लोप हुँदै गएको प्रति उनले दुःख प्रकट गरे र आफु बाँचुञ्जेल यसको संरक्षणमा लाग्ने समेत बताए । झोलामा सारङ्गी बोकेर जनताका गीत गाउँदै मोरङको बेलबारी पुगेका गन्धर्बले भने हामीजस्ता कलाकारलाई राज्यले हेर्ने नीति नहुँदा कलाकारको अबस्था माग्नेको जस्तै भयो । बाँच्न साह्रै गाह्रो भयो मेरो एउटै माग छ, राजयले कलाकारको अपमान होईन सम्मान गर्न सिकोस ।
About Unknown
0 comments:
Post a Comment