नेपाल जापान डट कम सम्बाददाता-
वैदेशिक रोजगारीमा सबैभन्दा बढी नेपाली जाने मलेसियाको एक बिमा कम्पनीले एकजना नेपालीलाई दुर्घटनामा परी खुट्टा गुमाएवापत एक करोड १२ लाख नेपाली रुपैयाँ क्षतिपूर्ति उपलब्ध गराएको छ ।
समाचार अनुसार कार्यरत रहेकै बेला दुर्घटनामा परी घाइते भएका पर्वत बाजुङका प्रेमबहादुर रेग्मीले तीन लाख ७२ हजार पाँच मलेसियन रिंगेट (करिब एक करोड १२ लाख रुपैयाँ) क्षतिपूर्ति पाएका हुन् ।
क्याराभान म्यानपावरबाट सन् २०१० जुलाई ७ मा मलेसिया पुगेका रेग्मी जेसिवाई एचडिडी कम्पनीमा आउटसोर्स कामदारको रुपमा कार्यरत थिए । सन् २०१२ जुलाई १२ मा कम्पनीको काम सकेर होस्टल फर्कने बेला बस दुर्घटनामा परेका थिए ।
दुर्घटनामा परेका रेग्मीको दाहिने खुट्टा काटिएको छ । दुर्घटनामा परेको दुई वर्षपछि बस कम्पनीसँगको कानुनी लडाइँ जितेपछि रेग्मीले मलेसियाको बिमा कम्पनी जुरिचबाट १७ हजार पाँच रिंगेट (पाँच लाख १० हजार एक सय ५०) र बस कम्पनीसँगबाट तीन लाख ५५ हजार रिंगेट (एक करोड ६ लाख ५० हजार) रुपैयाँ क्षतिपूर्ति पाएका हुन् ।
बिमा कम्पनीबाट विदेशी कामदार क्षतिपूर्ति योजनाअन्तर्गत रेग्मीले बिमा रकम पाएका हुन् । रेग्मीले बिमा रकम सन् २०१३ मार्च २० मा पाएका थिए । बस कम्पनीले क्षतिपूर्ति रकम समयमा नदिएपछि थप पाँच हजार रिंगेट हर्जाना भरेको थियो ।
बस कम्पनीलाई अदालतले दुई महिनाअघि नै क्षतिपूर्ति दिन भनेपनि एक महिना ढिलो गरी दिएको हो ।
मलेसियाका दातो अन्ना लिनको सहयोगमा नौ हजार रिंगेट पर्ने कृत्रिम खुट्टा लगाएर हिँडडुल गरिरहेका ३४ वर्षीय रेग्मीले पाएको क्षतिपूर्ति रकम श्रम तथा रोजगार राज्यमन्त्री टेकबहादुर गुरुङको हातबाट प्रदान गरिएको छ ।
रेग्मीलाई कानुनी लडाइँ र भाषा अनुवादमा सहयोग पुर्याएका व्यवसायी सुवास गिरीले वैदेशिक रोजगारीमा भएको दुर्घटनामा यति धेरै रकम पाएको यो पहिलो घटना हुनसक्ने बताए ।
त्यस्तै रेग्मीलाई नेपालमा गरिएको बिमाबाट पनि रकम भराउन पहल गरिएको छ । मलेसियामा रेग्मीलाई बिमा रकम भराउन सहयोग पुर्याएका अर्का व्यवसायी वाइबी राईले नै नेपालमा बिमा गरिएको कम्पनीबाट रकम दिलाउन पहल गरिरहेका छन् ।
About Unknown
0 comments:
Post a Comment